Прастольнае свята царквы Архіерэйскага Падвор’я

22 мая Царква адзначае памяць свяціцеля Мікалая Цудатворца. Свяціцель Мікалай, бадай, адзін з найбольш шанаваных святых і ў Заходняй, і ва Усходняй Цэрквах. Адметна, што свяціцеля шануюць нават прадстаўнікі мусульманскай рэлігіі.

У гонар гэтага найбольш вядомага хрысціянскага святога ў горадзе над Нёманам асвячоны адзін з прыдзелаў Свята-Пакроўскага кафедральнага сабора, а таксама храм Архіерэйскага Падвор’я. З гэтай прычыны ў дзень прастольнага свята Высокапраасвяшчэннейшы Уладыка Арцемій узначаліў служэнне Боскай літургіі ў гэтым храме. Яму саслужылі сакратар Гродзенскай епархіі, мітрафорны протаіерэй Анатолій Ненартовіч, благачынны Гродзенскай акругі протаіерэй Аляксандр Велісейчык, в.а. настаяцеля храма іерэй Мікалай Гайдук, клірыкі храма іерэй Аляксандр Рудзінскі і іерэй Павел Сяргееў, а таксама протадыякан Дзімітрый Шэпелеў і дыякан Дзімітрый Паўлюкевіч. Архіерэйскае набажэнства суправаджалася прыгожымі спевамі прыходскага хору пад кіраўніцтвам рэгента Ксеніі Собаль.

У часе літургіі адбылося дзве хіратоніі – іерэйская і дыяканская. Дыякан Дзімітрый Хямяляйнен быў рукапаложаны ў іерэя, а іпадыякан Дзімітрый Галамбоўскі – у дыякана.

Па заканчэнні літургіі адбыўся Хрэсны ход вакол храма, а напрыканцы – слаўленне каля іконы свяціцеля.

У часе пропаведзі Уладыка павіншаваў прысутных з прастольным святам і пажадаў кожнаму з нас следаваць прыкладу свяціцеля Мікалая ў сваім духоўным жыцці.

Свяціцель Мікалай – гэта ўзор дабрадзейнага жыцця. Нягледзячы на тое, што ён жыў не надта заможна, ён дзяліўся сваім набыткам з усімі, ў каго была нястача.

Уладыка адзначыў, што свяціцель заставаўся верны Госпаду і Яго запаведзям ва ўсіх жыццёвых выпрабаваннях. А гэты найбольш знаны ўгоднік Божы зазнаў нямала нягод на працягу свайго жыцця. Сярод іх – шматлікія катаванні за веру і за праўду Хрыстову. Адметна, што царкоўны ўстаў прадпісвае сёння спяваць на Боскай літургіі пракімен, гл. 7: “Восхвалятся преподобнии во славе и возрадуются на ложах своих”. Гэты пракімен выконваецца галоўным чынам на службах, прысвечаных памяці свяшчэннамучаніка, прападобнамучаніка і вызнаўцы. Святая Маці-Царква недарэмна ўстанавіла спяваць гэты пракімен у дзень памяці свяціцеля Мікалая. Хоць яго святасць не была яўлена праз пакутніцкую смерць, але свяціцеля можна назваць сапраўдным вызнаўцам, бо ён спазнаў нямала пакут за веру і ў часы ганенняў на хрысціянаў, і ў пазнейшыя часы, калі хрысціянства стала дзяржаўнай рэлігіяй. І пра тое, што свяціцель Мікалай нямала пакутаваў за Хрыста, сведчыць не толькі яго жыціе, але і навуковыя даследаванні яго пачэсных мошчаў.

Няхай жыццёвы подзвіг свяціцеля стане для нас прыкладам сапраўднага хрысціянскага жыцця. Няхай кожны з нас навучыцца пераймаць яго смеласць і цвёрдасць у адстойванні праўды Хрыстовай у сваім жыцці. Няхай кожны з нас стане тым, вакол каго, як і вакол свяціцеля Мікалая, са слоў прападобнага Серафіма Сароўскага, “уратуюцца тысячы”.

Зьміцер Даўгаполік-Пратасевіч

 

Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Прастольнае свята царквы Архіерэйскага Падвор’я
Раздел сайта:
Орфографическая ошибка в тексте:
Чтобы сообщить об ошибке, нажмите кнопку "Отправить сообщение об ошибке". Также вы можете добавить свой комментарий.
Article | by Dr. Radut